舊物

上星期，o係馬鞍山家攞咗兩大袋雜物回家，有好多舊相、舊poster、舊信.......

當然最大興趣都係一個鐵盒內的物件，是一堆舊情信、舊情人妹妹的信、朋友的信等等.....其實我每封都有重睇一次，真係百般滋味在心頭。原來以前有一個人係咁愛自己，不過真係差點兒遺忘咗﹗當然，其實呢個人一直都喺我心裡佔一個好重要嘅位置，我常常都有想起佢，只係限於在心中，但係唔係仍然是愛呢？我唔知.....只是知道原來以前唔識珍惜，死要面，唔肯表達自己思想﹗如果以前唔係咁，咁而家我哋又係點呢？

常常聽人講，最愛嘅唔係你嫁果個﹗我相信架，不過唔係唔愛個老公，只係唔係呢生人最愛，可能係年紀輕比較深刻。

好感動嘅短片!

以我一向都係重家庭、重親情嘅人看完呢個短片，真係喊到收唔到聲。

已經一年喇﹗

一年前唔開心嘅事，唔經唔覺都已經一年了。

我之前其實內心都鬥爭咗好耐，好唔好send個sms比佢祝佢生日快樂，到最後都係無做，好開心，自己真係可以做得到，既然都知道結果，點解仲要比人hurt多次呢﹗我相信對佢完完全全放下，比多少少時間我，我一定做得到﹗加油﹗

食神駕到

一到年尾，日日都係食食食，本來已經好肥，而家仲更加肥呀﹗救命﹗

星期五果日都係第一次參加CB CLUB嘅聚會，今次係食團年。除咗抽中咗CASH開心之外，其實氣氛都好重要，由頭笑到尾，真係好開心架﹗

尋日就CHRIS請食公司團年，本來BOOK咗8點半，點知等到9點3先有得入，都唔緊要，食個$4288套餐，竟然話冇乳豬，改併盤，但又唔會減錢，食完魚翅又停晒，追佢幾次先知師父以為黎晒，之後果D冇整到，又叫我哋改其他野食，總知個雞轉咗帶子西蘭花，生炒糥米飯又變咗楊洲炒飯，七食完都已經12:30，不過食物都OK架。

至於今晚就要同屋企人去龍華食團年飯，希望唔會好似尋日咁啦﹗

無啦啦玩足一天

尋日約咗lailai去咗剪頭髮，剪完都二點，跟住同Tiona & Lailai去飲荼，突然有人提議去唱K，我哋去咗一個懷舊金曲夜，唔舊唔唱，真係好鬼開心，平日我去K一定係瞓覺，點知我差D唔肯放底個咪，痴咗線﹗最後仲要等埋老公一齊去打冷，真係好鬼開心，好耐冇試過呀﹗

忙裡偷閒

好耐都冇同老公一齊放假，倆口子一早返工時間出門口扮返工，返咗大陸揼骨。再去尖沙咀行1881，佢話果度夜晚會好靚，咁就去行吓啦，都ok啦，不過好似細咗d﹗行完再去旺角食鐵板燒，又係一餐好飽嘅晚餐.....

另，今日下午土瓜灣有幢舊樓倒塌，有3死2失蹤，有好多人無家可歸，真係好慘﹗希望死者家屬能夠節哀順變，面對未來，好好生活﹗而無咗家園嘅人，希望政府可以幫到佢哋啦﹗

家姐的生日派對

姐夫為家姐準備咗一個神秘生日派對，早幾星期已經約咗我哋﹗到尾二果日終於都比爸爸爆咗少少出黎，好搞笑﹗去到樓下佢自己又爆晒出黎，哈哈哈﹗原來大話真係唔好講呀﹗我哋去荃灣黃仔味工房食日式私房菜，食咗一個超飽又好食嘅晚餐﹗D刺身都好新鮮，尤其是果個另加嘅蠔同埋時令海膽，真係超讚﹗最後係送禮物時間，緯哥送咗個LV袋同電話比靜儀，開心到佢吖﹗我並不是用禮物嘅價值去衡量，而係一個心，因為知佢老婆好買個袋﹗

另，之前我同緯哥講不如我哋自己比返啦，一個人比好貴架﹗佢話:我以前冇能力就話唔得姐，而家我得就等我黎啦﹗我好早前都已經覺得好少男人可以好似緯哥咁，真正做到愛屋及烏架，但係佢得囉，無論關於我哋屋企嘅大事小事都好盡心，好樂意去做﹗而且我都未見過佢有埋怨過(當然唔包括柏熙啦﹗)。

我祝佢哋一家永遠都開心快樂﹗